咁就無左40蚊

今日出街本黎諗住去拿書, 點知圖書館無開(正確係佢早左收), 白行一趟. 回程時經過大Happy, 心血來潮, 日日飲流質既我, 既然喉嚨好似無咁痛啦, 係唔係又可以試食固體呢? 咁耐無食肉, 係唔係可以試下呢? 心思思不如做件事, 黎開大Happy, 一於整番個餐先, 但選擇咁多, 邊樣好呢? 自己既然食到酸, 好啦, 咕嚕肉. 咦, 中湯係羅漢果煲豬骨, 正, 整多個先, 始終我無口水, 食飯既話有困難.

"251號飛仔請到櫃面取食物~~~~~~251號飛仔~~~~~~~"

嘩, 有得食. 拿左個餐埋位, 唔~~~~~ 先飲啖湯先, 咦? 無野呱, 點解個湯係苦架, 領野(事實係, 羅漢果係甘甜帶微苦架, 基於我食唔出甜, 於是就只係飲到苦啦, 至於豬骨? 即係無味囉, 我第一樣無既就係對脂肪既味覺啊嗎, 咁又點飲到豬骨味呢? ok, 下個禮拜同朋友仔食飯, 唔使考慮豬骨煲.)

再試舊咕嚕肉先, 唔, 咬感無變, 至少我知我咬到舊肉, 但係......夠肉係唔係過份出水而個廚師又唔記得左調味?(:P, 對唔住, 其實我知唔關大廚事, 佢水準好好架啦, 係自己衰姐.) 我似係咬緊豆渣囉, 再加埋堆炸粉, 唔掂, 個口唔夠濕, 想吞都好難, 快快飲啖"苦水"衝左佢落去先.

不如食啖飯啊, 嘩, 呢個真係要炳啦, d飯真係"粒粒"皆(吞得我好)辛苦, 唔掂, 又要出動苦水"沖廁所".

結果今日個實驗戰果如下:

1/ 白飯, 扒左一啖, 用湯送既.
2/ 湯, 飲左6羹, 其中4羹用黎"沖廁所".
3/ 咕嚕肉, 肉食左兩舊(好好架啦.), 青椒, 食左5舊, 呢個真係拿獎啊, 食到椒味, 又唔使用"沖廁所"既方式去吞, 蔬菜類, good.
4/ 熱檸茶, 飲左幾啖, 因為發現牙齒好似敏感, 居然痛...... -"- (之前食咕嚕肉都發覺到佢係痛架.)

賽後檢討:

1/ 以後既食物第一件事係要好濕好濕, 例如上湯浸娃娃菜, 金銀蛋浸莧菜之類個汁直情要好似湯咁.
2/ 飯要係湯飯類. ^_^ 冬瓜陳皮鴨腿湯飯, 可惜食唔到鴨腿啦, 或者講, 我唔鍾意唔似鴨腿鴨腿.
3/ 我有敏感牙齒, 做野, 唔係以後有排睇牙醫(其實, 電療之後係好易蛀牙架, 但我估唔到一個月就見效快成咁姐. 亡羊補牢, 亡羊補牢~~~~~~)
4/ 預算想下星期一番工, 唔~~~~~~ 但係, 我可以食d咩野呢係公司, 餐餐粥?
5/ 雖然只係食左兩舊肉咁大把, 但係番屋企刷牙個陣, 居然有好多肉渣吐到出黎, -"- 即係話, 沖廁所沖得唔干淨, 死啦, 以後唔係時時都可以一食完即刷牙, 咁......