排住食

今日係最後一日去完成一件好重要既事情的日子, 總算是勉強完成了, (事實上, 每次我都是這樣, 完成一件事後總會不滿意的, 儘管身邊人, 認識的不認識的都好, 他們都說你已是做得不錯了. 唉, 才不錯嗎? 我可是很想要做到完美. 唉, 又是這完美主義在作崇.)

事情完成後, 乘車出旺角逛一逛, 實在難以想像, 向來討厭人多車多的我竟會在旺角的街頭出沒. 當然, 仍是一貫的獨行俠作風. 哈哈, 沒辦法, 我始終都是比較喜歡一個人時的自由, 身體自由, 思想更自由. 看來要是有一天要被放逐到荒島的話, 我一定是最後活著回來的那個. ^_^

好, 閒話休說, 先說說今天的開心大發現. 話說當我到達旺角的時候, 已是下午五時, 還未食中午飯的我, 只想快點找些東西吃. 嘿, 星期六的旺角, 什麼地方都大排長龍, 就連那些街邊小食都唔例外. 離晒譜, 賣牛雜的都排長龍, 再看看那牛雜, 嘩~~~ 水又唔滾, 那牛肝看上去...... 算了, 反正我已不吃動物肝臟年多了, 這種程度的牛雜, 不足以令我破戒, 套用內地人的一句名句, "連門都沒有嘩~~~" (要用國語讀, 咁先傳神.)

繼續向前行, 居然搵到萬綠叢中一點紅, 周圍人群東一堆西一埋阻街既旺角, 居然有一檔係無人排隊架. 好野, 有得食. "咪住~~~~~~" 內心傳來了一把聲音, 如果其他人寧願等都唔黎食呢間野既話, 會唔會~~~~~~ 算罷啦, 有D野都係唔好同主流"對著干", 無自己好處. 算罷啦, 都係去排隊啦. (今次真係破戒, 居然會為左食街邊小食排隊, 而平時既我, 你要我為左食而等位? 我寧願去麥當勞.) 不過大家放心, 話左個檔牛雜完全吸引唔到我, 所以我絕對唔係排隊買牛雜, ^_^ 反而係見到前面無幾遠有檔肥姐小食, 賣鹵水XX, 好似幾正, 排就排啦.

等左五分鐘, 終於到我, 叫左兩串生腸, 兩串魷魚 (又發神經啦, 正常未試過既野, 我係唔會打孖上架, 但唔知點解今次會咁叫囉.), 走醬. 自從病完之後, 牙痛, 可以唔食醬都儘量唔食, 無謂玩自己, 不過豉油一定要. 老實講, 我就食唔出呢幾串野有咩野過人之處啦, (又或者, 對於味覺未回復100%的我, 無咩過人之處對於其他人就係好好味. 又或者, 重點就係D甜醬同芥辣度, 我走醬食就梗係食唔到阿肥姐既精髓所在啦.) Anyway, 下次最多係試下第樣, 又或者加番甜醬試下囉, 不過等我下次再去旺角又行開個邊先算啦.

食完兩串野, 唔多夠(飽), 心思思又想食第樣, 咦, 之前排晒長龍間燒餅店, 好似人散晒, 不如食燒餅啊. 間野極力推介佢地個燒餅王同武大郎燒餅. 唔~~~~~~ 唔多吸引我, 原因好簡單, 因為佢標榜自己肉多料足. 你唔好彩啦, 大病之後, 我既飲食已經係一百八十度改變, 肉對我黎講已經係近乎見到就想嘔個隻, 仲要我食肉? 咪啦. 之但係正想走既時候, 又俾我執到寶woo, 係一邊俾眾人冷落既一個不起眼小角落, 有一堆叫做蘿蔔燒米餅既野放係度賣唔去, 於是我就話啦, 整個蘿蔔燒米餅啊. (今次醒水啦, 第一次食, 梗係叫一客算啦.) 個餅用個好傳統下既紙袋裝俾我(如圖), 拿上手, 咦? 仲暖架woo,先加2分, 咬落去, 米餅超軟熟, 加5分, 蘿蔔非常清甜, 但又無掩蓋米餅既香味, good, 果然係武大郎番生, 呢個燒餅真係好食到, 連我呢個食咩都無咩味既人都讚, 你話有幾得呢. 一路食我就一路諗住同佢影張相, 但係真係食到停唔到口, 結果只係剩番個袋, 一於影低佢, 記住間鋪頭名先. 間野就係行去廣華醫院條路度, 好易搵架咋, 有興趣就去食下啦, 記住, 係蘿蔔燒米餅, 唔好叫錯.