今日第一次去見腫瘤科醫生, 會診既係一位女醫生 -- 吳醫生. 估唔到未睇症之前, 醫生已plan好晒未來既計劃, 首先係下個星期密密麻麻既治療前準備, 由於放射治療係必備, 又照射既位置係頭同頸, 所以要先睇牙醫, 確保做放射治療時唔會對口腔牙齒有大影響. 同一日我諗我會去照埋肺. 血今日就抽左啦, 嘩, 作死佢啊, 一抽抽八筒血, 成世仔流既蚊飯都無今日抽既多. 星期二去整頭盔, 星期三照設計用CT, 簽名既時候好似睇到係做contrast CT, 即係要注射造影劑, 聽講支針筷子咁粗, 唔係呱, 會唔會誇左些少啊. (Willy 曾這樣說過:"很害怕打那支輸顯影劑的針，怎會有這樣粗的針？匪夷所思......" T.T 唔好嚇我......)星期三正式受靶, 十一點開始唔準食同飲, OH MY GOD!
^_^ 星期四十一國慶, 我可以由驚濤駭浪中喘息下啦. 星期五要去做MRI, 而家公立醫院都有呢家野真係好, 我仲係醫學生時代, 照MRI, 都係叫病人去養和架, 唉, 醫療強積金, 似乎真係有呢個需要, 始終坐食山崩. 搞一大輪, 終於都完左事前既準備啦. (其實仲要約物理治療師, 特別係唔想以後開唔到口同埋十分硬頸既話.)
之後吳醫生就同我傾番大約個療程有咩野做, 放射治療唔少得架啦, 佢話呢個大約要做七個星期, 一至五日日去電. 我記得以前好似係做五個星期, 可能而家新既療法啦, OH NO, 又要去Mc Barrons度買番本新既clinical oncology惡補下啦. 由於我後生, 吳醫生話可能會加埋化療. 我個人就無所謂既, 應該都頂得順呱. 但係我知道妳媽媽可能唔同意, 佢個陣都唔同意妳做化療, 唉, 但係妳個情況太特殊啦. 唔~~~~~~ 唔知我會唔會同妳一樣, 化療唔嘔又唔脫髮呢? ^_^ 代禱, 妳要係天家同我代禱啊. 哈哈, 我係男仔, 鏟晒d頭髮就唔怕脫髮啦. ^_^
好, 今日既診症過程報告完畢, 下次再講, ^_^ 我一定會影支顯影劑既針俾大家睇下. ^_^
沒有留言:
張貼留言