第一日去見牙醫, 結果俾佢一口氣打甩左面上下兩隻智慧齒. 其實, 我左邊既智慧齒生得好好架, 無端端俾人扯甩左, 相信佢地到死都唔明白點解. ^_^ 至於佢地既鄰居, 可能見到佢地被殺既場面太過血腥, 嚇呆左, 到今日都仲未完全復工, 總係有些少酸痛. 而家安撫緊右邊既兄弟, 因為同樣既大屠殺聽日會再黎一次, 而且, 因為下面個隻唔生性係打橫出架, 所以呢, 聽日一定比尋日更血腥.
至於今日就係去整頭盔兼第一次見放射治療科既醫生. 唔, 我個人覺得今日個醫生相當冰冷, 同第一日個位充滿朝氣既吳醫生相比, 好明顯係兩類人, 機械式既語調, 只係重複小冊子上既資料. 好老實, 咁layman既野, 一般病人都嫌悶啦, 更何況我呢類受過"高等教育"既人 :P. 反而係幫我整頭盔個班醫護人員就正好多啦, 係個過程有講有笑, 輕輕鬆鬆又一個鐘. 可能憂心忡忡既病人唔多鍾意咁樣, 有咩理由呢個時候你班友仲有心情笑? 但計我話, 哭有時, 笑有時, 歡樂有時, 悲傷有時, 生有時, 死有時啊, 點解要剥奪人地既快樂呢? 笑住死同喊住死, 你都想選擇前者架.
沒有留言:
張貼留言