依然係燒餅皇

今日出開去旺角, 嘻嘻, 又係登打士街個頭, 梗係順道探下燒餅皇啦.
合我口味既蘿蔔燒米餅當然係首選, 誰不知, 賣晒, 無貨. (d人係唔係咁識食啊.)無計, 只好試下另外一款燒米餅(個名就咁叫燒米餅), 另外今日有淑女餅賣, 當然亦都叫番一個試下啦.
燒米餅依舊又軟又暖(^_^, 咁似以前d文人描述女人既?), 至於個餡--原來係粟米豬肉, ^_^ 一講到肉就唔知好唔好味啦, 因為我食唔出肉味, 但係個餅依然ok, 有米既香味. 所以, 相比起上黎, 我個人都係鍾意蘿蔔燒米餅多少少, 雖然無肉. 但蘿蔔既香甜真係令到個餅 "寧舍不同".
至於所謂淑女餅, ^_^ 原來即係中式酥皮豬肉餅. ^_^ 無錯, 又係肉, 不過今次個皮就有少少似嫁女餅層皮. 的確, 佢食落唔似燒米餅咁多油, 但係, 落得肉既你都唔好諗住可以瘦得去邊. ^_^ 女士食唔食就真係自己諗啦.
另外, 今日終於見到武大郎燒餅既廬山真面目, 原來係一個大都嚇親人既燒餅, (真係大餅無講錯) 一個要10蚊, 但係絕對比兩個燒米餅仲要大囉. 我前面對夫婦叫左一個, 切開食, 我有機會見下裡面係咩野, oh no, 又係肉, (睇落有些少似淑女餅d餡) 算啦, 反正一我自己食唔晒個餅, 二我對肉無興趣, 呢個武大郎燒餅就, 見識過就算啦.
綜合兩次既試食, 最後都係打算推介蘿蔔燒米餅, 希望下次去開既時候唔會又賣晒啦. ^_^

補充:
原來兩次去到我都係無興趣叫牙擦蘇試下, 可能係個賣相唔得, 似手指包囉, 但係, 無理由以貌取餅架, 靚女又有幾多個係烈女啊 (話分兩頭, 又靚又三貞九烈既都仲有人在既, 唔信既不妨去大小教會結識下.), 有時個樣靚有鬼用咩, ^_^ 下次點都要試下呢樣至得.