第三針化療加第11次電療

今日打第三針化療, 幸運地, 到今日都似乎未有太大既化療副作用. 一個同我差唔多年紀既男人聽講已經要換止嘔藥, 但係都好似仲係頂唔順. 而我就仲係依然拿住第一次開既個十幾粒矇仔藥, 化療到中段都仲唔嘔, 已經算係唔錯既恩典啦. 知足, 做人要知足. 但我依然祈禱, 千祈唔好嘔.

至於電療就第11次啦, 我之前兩日見到個電左14次既病友, 已經開始嚴重脫髮, 至於我? 頭髮仲頂得住. 仲係度. 又係一個奇妙恩典啦. ^_^ 至於口腔, 呢幾日發現上鄂好似結左層痂. 嘩, 真係好彩啦, 咁樣個口就無咁痛, 你試諗下, 假如無呢一層痂, 我成個口就會係一大片痱"支"(:P 執筆忘字, Sorry ), 到時就真係有得我受啦. 果然, 假如主係要保護我, 總會有佢既方法. :P 但不禁又要問, 點解又要整個咁既病呢? 無, 咪唔使咁辛苦去保護我囉. ^_^ 唔~~~~~~ 我依然係咁諗, 有一d野, 或者, 係一定要有呢個經歷, 我先感悟到, 睇得到都唔定呢.

咁我要用心睇, 用心睇, 用心睇, 機會錯過左就無架啦. (:P 大吉利是咩, 仲想再黎一次? 唔好玩啦 ^_^)