依然都係試味結果. ^_^ 就黎可以出本給鼻咽癌康服者的米芝蓮 :-)

今日去左病之前成日都會幫襯既別府, 其實我係想睇下日本野我食唔食到呢?

入到去叫左個海鮮拉麵,叫左個七味魷魚, 叫左一杯葡萄梳打. (咁都要成舊幾水埋單, 真係心都痛埋.)到底個試味結果係點呢?

1/ 海鮮既天然鮮味全部無晒, 蝦, 蟹, 帶子, 唔用眼睇住黎食, 你未必分到邊樣打邊樣. 都係一樣, 無味.
2/ 拉麵完全無麵粉既香味, 一條條泥膠一樣. 加上治療後口張不大, 不用再幻想可以食到"殊殊"聲, 你唔咬斷佢你唔使旨意你個口裝得晒. 唔知係唔係自己個口未完全好晒, 吞麵個陣, 上鄂仲係有少少痛, 可忍受範圍, 但就嚴重影響我食晒碗麵既決心.
3/ 個麵湯值得一讚, 有味, 雖然唔係以前個隻鮮味啦, 但絕對係超出預算的好味. :-)
4/ 七味魷魚係一個錯決, 早知叫鹽燒鯖魚, 燒魷魚干到阿媽都唔認得, 頭同鬚都食唔到, 只係可以食個身, 不過都係干, 要用茶沖廁所, 而且, 以前可以一個口放三舊, 而家就最多一舊, 多只有係玩自己既姐.
5/ 醬油絕對係經典, 無味架, 不過我又諗, 會唔會以前食到既醬油其實係甜味, 所以而家就覺得無味呢? 因為無叫壽司, 確定唔到呢樣.
6/ 葡萄梳打全無驚喜, 意料之內, 總之一個字, 酸, 就係咁啦.

食完野行左幾步又口渴, 買左個咖啡, :-) 勁啊, 水一樣, 甜苦味都無, 估唔到苦同澀都飲唔到, 剩係飲到有咖啡香味既白開水. 到底係唔係真係吃不了苦( :-) )呢? 今晚食苦瓜個陣就知啦.

好啦, 聽日番工, :-) 可以試下唔同口味既汽水啦, 我個人認為係得雪碧可能會有反應架咋, 至於可樂......算罷啦, 別抱任何希望.